Nafarroako Gobernuak euskarazko hedabideentzako diru laguntzak guztiz kendu nahi ditu

Udane MIGELTORENA

Nafarroako Gobernuak euskarazko hedabideentzat ematen zituen diru laguntzak bertan behera uztea aurreikusi du 2012rako. Topagunea Euskara Elkarteen federazioak eta Nafarroako euskarazko hedabideek hurrengo urteetarako etorkizuna zaila izango dela adierazi dute.

Azaroaren hasieran, Nafarroako gobernuak 2011ko diru laguntzen bigarren epealdiko esleitutako laguntzak murriztuko zirela jakinarazi zuen. Baina murrizketa horiek erabatekoak izan daitezkeela adierazi du Euskarabideak.

Azken urteetan murriztuz joan da Nafarroako Gobernuak euskarazko hedabideentzat emandako diru laguntza. Hedabideen eta Topagunearen ustez, erabakia “erabaki politikoa” da eta benetan ez dago diru eskasiarik, Gobernuak esaten duen moduan. Diru laguntzak guztiz kentzeak jarduerarekin jarraitzeko aukerak zeharo trabatzen dituela dio elkarteak. Azken honek gaineratu du Gobernuak euskarazko hedabideei babes ekonomikoa ez emateaz gain, aitortzarik ere ez diola ematen eta ikusezin bihurtzen dituela.

Hezkuntza beharrezko zerbitzu publikoa dela babestu dute milaka pertsonak Iruñean

 Udane MIGELTORENA

Milaka pertsona elkartu ziren atzo Iruñean Nafarroako Gobernuak hezkuntzan egin dituen murrizketen aurka. Antioniutti parketik abiatu zen manifestazioa eta Gazteluko plazan eman zioten amaiera honi. Udaltzainen arabera, 20.000 pertsona izan ziren “Hezkuntzan murrizketak ez” pankartaren atzean joan ziren manifestariak. 

Hezkuntzako inbertsioa berreskuratzea eskatu zuten, egindako murrizketak bertan behera utzita. Manifestazioaren deialdia hezkuntzan ordezkaritza duten bederatzi sindikatuek, IAk, eta Sortzen eta Herrikoa elkarteek egin zuten. Gainera, deialdiarekin beste hainbat elkarte eta koalizioek bat egin zuten.. Hala nola, hezkuntza eta osasun saileko langile batzordeek, hezkuntza eta guraso elkarteek, Bildu, Ezkerra eta NaBai koalizioek.

Datozen egunetarako bi deialdi egin dituzte. Batetik, bi orduko lanuzteak izango dira asteartean. Eta bestetik, hilaren 27an greba eguna izanik, manifestazioa ere antolatu dute.

Irakasle postuen murrizketa salatzeko manifestazio jendetsua izan da Baionan

Ipar Euskal Herriko ikastetxeetan greba deitu dute gaur Frantziako Gobernuak egin dituen murrizketak salatzeko asmoz. Intersindikalak eta FERC-CGT, FSU, SGEN CFDT eta UNSA Education taldeak izan dira greba deitu dutenak. LABek ere deialdiarekin bat egin du. Hau bat dator beste sindikatuek egin duten eskaerarekin. Baina horrez gain, euskararen irakaskuntzarako baliabideen emendatzea eskatzen du.

Sindikatuen arabera grebaren jarraipena %75ekoa izan da Pirinio Atlantiko Departamentuan. Baina ikuskaritzaren arabera greba irakasleen %40ak jarraitu du. Greba deialdia hezkuntza publikoko ikastetxei zuzendua bazen ere, ikastetxe pribatuetako langile asko grebara atera dira gaur Ipar Euskal Herrian.

Goizeko 10:30ean elkarretaratzea egin dute Baionan burtsaren aurrean eta 11:00etan manifestazioa abiatu da. Manifestazioan irakasleak nagusitzen baziren ere haurrak eta gurasoak ere ibili dira kalez kale. Sindikatuak blokeetan joan dira, Gararen arabera LABena izan da jendetsuena. "Kalitatezko hezkuntzaren alde, murrizketarik ez" leloa zuen pankartaren atzean joan dira sindikatu abertzalearen jarraitzaileak. Intersindikalaren multzoa, berriz, frentsesez "Herrialde bat, eskola bat, gure etorkizuna" zioen pankartaren atzean joan da.

Sindikatuek astartean egindako agerraldian Frantziako Hezkuntza Ministerioari hurrengo aurrekontuetan beste logika bat ezartzea eta hezkuntza sistemaren eraldaketa demokratikoa eskatu zioten. Aurten 29 irakasle lanpostu kendu dituzte departamenduan, eta azken lau urteetan 70 lanpostu guxtxiago daude. Gainera, 16.000 lanpostu gutxiango aurreikusi ditu Gobernuak ikasturte berrirako, 60.000 ikasle gehiago izango zirela jakin arren.